Mukunda Mala Stotram | श्री मुकुन्दमाला स्तोत्र | Free PDF Download
(1) śrī-vallabheti vara-deti dayā-pareti
bhakta-priyeti bhava-luṇṭhana-kovideti
nātheti nāga-śayaneti jagan-nivāsety
ālāpinaḿ prati-dinaḿ kuru māḿ mukunda
(2) jayatu jayatu devo devakī-nandano ‘yaḿ
jayatu jayatu kṛṣṇo vṛṣṇi-vaḿśa-pradīpaḥ
jayatu jayatu megha-śyāmalaḥ komalāńgo
jayatu jayatu pṛthvī-bhāra-nāśo mukundaḥ
(3) mukunda mūrdhnā praṇipatya yāce
bhavantaḿ ekāntaḿ iyantam arthaḿ
avismṛtis tvac-caraṇāravinde
bhave bhave me ‘stu bhavat-prasādāt
(4) nāhaḿ vande tava caraṇayor dvandvam advandva-hetoḥ
kumbhīpākaḿ gurum api hare nārakaḿ nāpanetuḿ
ramyā-rāmā-mṛdu-tanu-latā nandane nāpi rantuḿ
bhāve bhāve hṛdaya-bhavane bhāvayeyaḿ bhavantaḿ
(5) nāsthā dharme na vasu-nicaye naiva kāmopabhoge
yad bhāvyaḿ tad bhavatu bhagavan pūrva-karmānurūpaḿ
etat prārthyaḿ mama bahu mataḿ janma-janmāntare ‘pi
tvat-pādāmbhoruha-yuga-gatā niścalā bhaktir astu
(6) divi vā bhuvi vā mamāstu vāso
narake vā narakāntaka prakāmaḿ
avadhīrita-śāradāravindau
caraṇau te maraṇe’pi cintayāmi
(7) cintayāmi hariḿ eva santataḿ
manda-hāsa-muditānanāmbujam
nanda-gopa-tanayaḿ parāt param
nāradādi-muni-vṛnda-vanditam
(8) kara-caraṇa-saroje kāntiman-netra-mīne
śrama-muṣi bhuja-vīci-vyākule ‘gādha-mārge
hari-sarasi vigāhyāpīya tejo-jalaughaḿ
bhava-maru-parikhinnaḥ kleśam adya tyajāmi
(9) sarasija-nayane saśańkha-cakre
murabhidi mā viramasva citta rantum
sukhataram aparaḿ na jātu jāne
hari-caraṇa-smaraṇāmṛtena tulyam
(10) mābhīr manda-mano vicintya bahudhā yamīśvaraḿ yātanā
naivāmī prabhavanti pāpa-ripavaḥ svāmī nanu śrīdharaḥ
ālasyaḿ vyapanīya bhakti-sulabhaḿ dhyāyasva nārāyaṇam
lokasya vyasanāpanodana-karo dāsasya kiḿ na kṣamaḥ
(11) bhava-jaladhi-gatānāḿ dvandva-vātāhatānāḿ
suta-duhitṛ-kalatra-trāṇa-bhārārditānām
viṣama-viṣaya-toye majjatām āplavānāḿ
bhavati śaraṇam eko viṣṇu-poto narāṇām
(12) bhava-jaladhim agādhaḿ dustaraḿ nistareyaḿ
katham aham iti ceto mā sma gāḥ kātaratvam
sarasija-dṛśi deve tārakī bhaktir ekā
naraka-bhidi niṣaṇṇā tārayiṣyaty avaśyam
(13) tṛṣṇā-toye madana-pavanoddhūta-mohormi-māle
dārāvarte tanaya-sahaja-grāha-sańghākule ca
saḿsārākhye mahati jaladhau majjatāḿ nas tri-dhāman
pādāmbhoje varada bhavato bhakti-nāvaḿ prayaccha
(14) pṛthvī-reṇur aṇuḥ payāḿsi kaṇikāḥ phalguḥ sphulińgo laghus
tejo niḥśvasanaḿ marut tanutaraḿ randhraḿ su-sūkṣmaḿ nabhaḥ
kṣudrā rudra-pitāmaha-prabhṛtayaḥ kiṭāḥ samastāḥ surā
dṛṣṭe yatra sa tārako vijayate śrī-pāda-dhūli-kaṇāḥ
(15) he lokāḥ śrīnuta prasuti-marana-vyadhes cikitsaḿ imam
yoga-jñaḥ samudaharanti munayo yaḿ yajñavalkyadayah
antar-jyotir ameyaḿ ekam amṛtaḿ kṛṣṇakhyam apiyatam
tat pitaḿ paramauṣadhaḿ vitanute nirvanam atyantikam
(16) he martyāḥ paramaḿ hitaḿ śrīnuta vo vakṣyami sańkṣepataḥ
saḿsārarnavam apad-urmi-bahulaḿ samyak pravisya sthitaḥ
nana-jñanam apasya cetasi namo nārāyaṇayety amum
mantraḿ sa-pranavaḿ pranama-sahitaḿ pravartayadhvaḿ muhuḥ
(17) nāthe naḥ puruṣottame tri-jagatām ekādhipe cetasā
sevye svasya padasya dātari pare nārāyaṇe tiṣṭhati
yaḿ kañcit puruṣādhamaḿ katipaya-grāmeśam alpārtha-daḿ
sevāyai mṛgayāmahe naram aho mūḍhā varākā vayam
(18) baddhenāñjalinā natena śirasā gātraiḥ sa-romodgamaiḥ
kaṇṭhena svara-gadgadena nayanenodgīrṇa-bāṣpāmbunā
nityaḿ tvac-caraṇāravinda-yugala-dhyānāmṛtāsvādinām
asmākaḿ sarasīruhākṣa satataḿ sampadyatāḿ jīvitam
(19) yat krsna-praṇipāta-dhūli-dhavalaḿ tad varṣma tad vai śiras
te netre tamasojjhite su-rucire yābhyāḿ harir dṛśyate
sā buddhir vimalendu-śańkha-dhavalā yā mādhava-dhyāyinī
sā jiḥvāmṛta-varṣiṇī prati-padaḿ yā stauti nārāyaṇam
(20) jihve kīrtaya keśavaḿ mura-ripuḿ ceto bhaja śrīdharam
pāṇi-dvandva-samarcayācyuta-kathāḥ śrotra-dvaya tvaḿ śṛṇu
kṛṣṇaḿ lokaya locana-dvaya harer gacchāńghri-yugmālayam
jighra ghrāṇa mukunda-pada-tulasīḿ mūrdhan namādhokṣajam
(21) āmnāyābhyasanāny araṇya-ruditaḿ veda-vratāny anv-aham
medas-cheda-phalāni pūrta-vidhayaḥ sarvaḿ hutaḿ bhasmani
tīrthānām avagāhanāni ca gaja-snānaḿ vinā yat-pada-
dvandvāmbhoruha-saḿsmṛtiḿ vijayate devaḥ sa nārāyaṇah
(22) madana parihara sthitiḿ madīye
manasi mukunda-padāravinda-dhāmni
hara-nayana-kṛśānunā kṛśo’si
smarasi na cakra-parākramaḿ murāreḥ
(23) nāthe dhātari bhogi-bhoga-śayane nārāyaṇe mādhave
deve devaki-nandane sura-vare cakrāyudhe śārńgiṇi
līlāśeṣa-jagat-prapañca-jaṭhare viśveśvare śrīdhare
govinde kuru citta-vṛttim acalam anyais tu kiḿ vartanaiḥ
(24) mā drākṣaḿ kṣīṇa-puṇyān kṣaṇam api bhavato bhakti-hīnān padābje
mā śrauṣaḿ śrāvya-bandhaḿ tava caritam apāsyānyad-ākhyāna-jātam
mā smārṣaḿ mādhava tvām api bhuvana-pate cetasāpahnuvānān
mā bhūvaḿ tvat-saparyā-vyatikara-rahito janma-janmāntare’pi
(25) maj-janmanaḥ phalaḿ idaḿ madhu-kaitabhāre
mat-prārthanīya-mad-anugraha eṣa eva
tvad-bhṛtya-bhṛtya-paricāraka-bhṛtya-bhṛtya-
bhṛtyasya bhṛtya iti māḿ smara loka-nātha
(26) tattvaḿ bruvāṇāni paraḿ parastān
madhu kṣarantīva mudāvahāni
pravartaya prāñjalir asmi jihve
nāmāni nārāyaṇa-gocarāṇi
(27) namāmi nārāyaṇa-pāda-pańkajaḿ
karomi nārāyaṇa-pūjanaḿ sadā
vadāmi nārāyaṇa-nāma nirmalaḿ
smarāmi nārāyaṇa-tattvam avyayam
(28) śrī-nātha nārāyaṇa vāsudeva
śrī-kṛṣṇa bhakta-priya cakra-pāṇe
śrī-padmanābhācyuta kaitabhāre
śrī-rāma padmākṣa hare murāre
(29) ananta vaikuṇṭha mukunda kṛṣṇa
govinda dāmodara mādhaveti
vaktuḿ samartho’pi na vakti kaścid
aho janānāḿ vyasanābhimukhyam
(30) bhaktāpāya-bhujańga-gāruḍa-maṇis trailokya-rakṣā-maṇir
gopī-locana-cāṭakāmbuda-maṇiḥ saundarya-mudrā-maṇiḥ
yaḥ kānta-maṇi-rukmiṇī-ghana-kuca-dvandvaika-bhūṣā-maṇiḥ
śreyo deva-śikhā-maṇir diśatu no gopāla-cūḍā-maṇiḥ
(31) śatru-cchedaika-mantraḿ sakalaḿ upaniṣad-vākya-sampūjya-mantraḿ
saḿsāroccheda-mantraḿ samucita-tamasaḥ sańgha-niryāṇa-mantram
sarvaiśvaryaika-mantraḿ vyasana-bhujaga-sandaṣṭa-santrāṇa-mantraḿ
jihve śrī-kṛṣṇa-mantraḿ japa japa satataḿ janma-sāphalya-mantram
(32) vyāmoha-praśamauṣadhaḿ muni-mano-vṛtti-pravṛtty-auṣadhaḿ
daityendrārti-karauṣadhaḿ tri-bhuvane sañjīvanaikauṣadham
bhaktātyanta-hitauṣadhaḿ bhava-bhaya-pradhvamsanaikauṣadhaḿ
śreyaḥ-prāpti-karauṣadhaḿ piba manaḥ śrī-kṛṣṇa-divyauṣadham
(33) kṛṣṇa tvadīya-pada-pańkaja-pañjarāntam
adyaiva me viśatu mānasa-rāja-haḿsaḥ
prāṇa-prayāṇa-samaye kapha-vāta-pittaiḥ
kaṇṭhāvarodhana-vidhau smaraṇaḿ kutas te
(34) cetas cintaya kīrtayasva rasane namrī-bhava tvaḿ siro
hastāv añjali-sampuṭaḿ racayataḿ vandasva dīrghaḿ vapuḥ
ātman saḿśraya puṇḍarīka-nayanaḿ nāgācalendra-sthitaḿ
dhanyaḿ puṇyatamaḿ tad eva paramaḿ daivaḿ hi sat-siddhaye
(35) śṛṇvan janārdana-kathā-guṇa-kīrtanāni
dehe na yasya pulakodgama-roma-rājiḥ
notpadyate nayanayor vimalāmbu-mālā
dhik tasya jīvitam aho puruṣādhamasya
(36) andhasya me hṛta-viveka-mahā-dhanasya
cauraiḥ prabho balibhir indriya-nāmadheyaiḥ
mohāndha-kūpa-kuhare vinipātitasya
deveśa dehi kṛpāṇasya karāvalambam
(37) idaḿ śarīraḿ śata-sandhi-jarjaraḿ
pataty avaśyaḿ pariṇāma-peśalaḿ
kim auṣadhaḿ pṛcchasi mūḍha durmate
nirāmayaḿ kṛṣṇa-rasāyaṇaḿ piba
(38) āścaryam etad dhi manuṣya-loke
sudhāḿ parityajya viṣaḿ pibanti
nāmāni nārāyaṇa-gocarāṇi
tyaktvānya-vācaḥ kuhakaḥ paṭhanti
(39) tyajantu bāndhavāḥ sarve
nindantu guravo janāḥ
tathāpi paramānando
govindo mama jīvanam
(40) satyaḿ bravīmi manujāḥ svayaḿ ūrdhva-bāhur
yo yo mukunda narasiḿha janārdaneti
jīvo japaty anu-dinaḿ maraṇe raṇe vā
pāṣāṇa-kāṣṭha-sadṛśāya dadāty abhīṣṭam
(41) nārāyaṇāya nama ity amuḿ eva mantraḿ
saḿsāra-ghora-viṣa-nirharaṇāya nityam
śṛṇvantu bhavya-matayo yatayo’nurāgād
uccaistaraḿ upadiśāmy ahaḿ ūrdhva-bāhuh
(42) cittaḿ naiva nivartate kṣaṇam api śrī-kṛṣṇa-pādāmbujān
nindantu priya-bāndhavā guru-janā gṛḥnantu muñcantu vā
durvādaḿ parighoṣayantu manujā vaḿśe kalańke’stu vā
tādṛk-prema-dharānurāga-madhunā mattāya mānaḿ tu me
(43) kṛṣṇo rakṣatu no jagat-traya-guruḥ kṛṣṇo hi viśvambharaḥ
kṛṣṇād eva samutthitaḿ jagad idaḿ kṛṣṇe layaḿ gacchati
kṛṣṇe tiṣṭhati viśvaḿ etad akhilaḿ kṛṣṇasya dāsā vayaḿ
kṛṣṇenākhila-sad-gatir vitaritā kṛṣṇāya tasmai namaḥ
(44) he gopālaka he kṛpā-jalanidhe he sindhu-kanyā-pate
he kaḿsāntaka he gajendra-karuṇā-pārīṇa he mādhava
he rāmānuja he jagat-traya-guro he puṇḍarīkākṣa māḿ
he gopījana-nātha pālaya paraḿ jānāmi na tvāḿ vinā
(45) dārāvārākara-vara-sutā te tanūjo viriñciḥ
stotā vedas tava sura-gaṇā bhṛtya-vargaḥ prasādaḥ
muktir māyā jagad avikalaḿ tāvakī devakī te
mātā mitraḿ bala-ripu-sutas tat tvad anyaḿ na jāne
(46) praṇāmam īśasya śiraḥ-phalaḿ vidus
tad-arcanaḿ pāṇi-phalaḿ divaukasaḥ
manaḥ-phalaḿ tad-guṇa-tattva-cintanaḿ
vacaḥ-phalaḿ tad-guṇa-kīrtanaḿ budhāḥ
(47) śrīman-nāma procya nārāyaṇākhyaḿ
ke na prāpur vāñchitaḿ pāpino’pi
hā naḥ pūrvaḿ vāk-pravṛttā na tasmiḿs
tena prāptaḿ garbha-vāsādi-duḥkham
(48) dhyāyanti ye viṣṇum anantam avyayam
hṛt-padma-madhye satataḿ vyavasthitam
samāhitānāḿ satatābhaya-pradaḿ
te yānti siddhiḿ paramāḿ tu vaiṣṇavīm
(49) tat tvaḿ prasīda bhagavan kuru mayy anāthe
viṣṇo kṛpāḿ parama-kāruṇikaḥ khalu tvam
saḿsāra-sāgara-nimagnam ananta dīnam
uddhartum arhasi hare puruṣottamo’si
(50) kṣīra-sāgara-tarańga-śīkarā-
sāra-tārakita-cāru-mūrtaye
bhogi-bhoga-śayanīya-śāyine
mādhavāya madhu-vidviṣe namaḥ
(51) alam alam alam ekā prāṇināḿ pātakānāḿ
nirasana-viṣaye yā kṛṣṇa kṛṣṇeti vāṇī
yadi bhavati mukunde bhaktir ānanda-sāndrā
karatala-kalitā sā mokṣa-samrājya-lakṣmīḥ
(52) yasya priyau śruti-dharau kavi-loka-vīrau
mitrau dvi-janma-vara-padma-śarāv abhūtām
tenāmbujākṣa-caraṇāmbuja-ṣaṭ-padena
rājñā kṛtā kṛtir iyaḿ kulaśekhareṇa
(53) mukunda-mālāḿ paṭhatāḿ narāṇām
aśeṣa-saukhyaḿ labhate na kaḥ svit
samasta-pāpa-kṣayam etya dehī
prayāti viṣṇoḥ paramaḿ padaḿ tat
Download PDF